1Jo 1 | MED | STEP | Unt kuimp tepa, puⱡ puⱡ mondpa uⱡ pitim ei, tᵾn kᵾndᵾrmᵾn. Wote, ki raⱡ ndi ᵾmbᵾrmᵾn, tᵾn nga mong raⱡ ndi kᵾndᵾrmᵾn, wote kum raⱡ ndi, Kont Mba Mul Ik ei pitmᵾn.

1 John 1

Jon Ndi, Mon Kuimp Tepa Rurum Ei, Got Nga Ik Ei Ndi, Wamp Kont Mundrum

1 Unt kuimp tepa, puⱡ puⱡ mondpa uⱡ pitim ei, tᵾn kᵾndᵾrmᵾn. Wote, ki raⱡ ndi ᵾmbᵾrmᵾn, tᵾn nga mong raⱡ ndi kᵾndᵾrmᵾn, wote kum raⱡ ndi, Kont Mba Mul Ik ei pitmᵾn. 2 Kont mul uⱡ ei, etpa mot nduⱡnga, kandpᵾn enim kᵾn ik nᵾtmᵾn. Ei uⱡ nga kᵾnt nga kont mul uⱡ ei, Tipam kᵾn moⱡpa urum. Ei tᵾn kᵾn etpa mot nduⱡnga kᵾndᵾrmᵾn. 3 Tᵾn ndi, uⱡ kandpᵾn, pilpᵾn itmᵾn uⱡ nimbᵾ, enim kᵾn tᵾp tenda etpᵾn moⱡpᵾn, kundpᵾn nᵾnmᵾn ku. I etmin uⱡ ei, tᵾn kᵾn Got Tipam kᵾn, kangᵾm Jisas Kraist kᵾn, numan pᵾtmbᵾⱡ ei mel, enim kᵾn tᵾn kᵾn, numan tenda pangga. 4 Tᵾn mon rop ngonmᵾn ei, enim kᵾn tᵾn kᵾn, numan kai pepa kᵾndᵾk etangga, nimbun mon rop ngunmᵾn.

Tᵾn Got Nga Rᵾⱡang Ila Ʉndᵾmᵾn

5 Tᵾn Got Kangᵾm nga ik pilpᵾn tᵾtmᵾn mbᵾ, enim kundᵾp nᵾnmᵾn. Got Wu Rᵾⱡang Pi ei morum. Rumbᵾⱡ ti, elim kᵾn muⱡi nambrᵾm, mon! 6 Tᵾn Got kᵾn tᵾp tenda etpᵾn moⱡpᵾn, ik nᵾtmᵾn ku nimbun, wote rumbᵾⱡ mul uⱡ mbila ᵾndmᵾn ndam, tᵾn nga ik nᵾtmᵾn ei kᵾn, wote nombuⱡa andᵾrmᵾn uⱡ mbᵾ kᵾn, mba kol etᵾm. 7 Wote, elim rᵾⱡang ila morum ei mel, tᵾn rᵾⱡang ila nombuⱡa ᵾndmᵾn ndam, tᵾn nga ᵾngᵾnᵾl mbᵾ kᵾn, numan tenda pᵾtmᵾn. Wote, Got nga Kangᵾm Jisas nga mema ei ndi, tᵾn nga uⱡ kit mbᵾ kil ngumba, tᵾn etpa eng nondrᵾm. 8 Wote, tᵾn uⱡ kit mat iti natᵾtmᵾn nimᵾn ndam, tᵾn ndi, tᵾndun tᵾp ik kuldamina, wote ik kupa ei, tᵾn kᵾn pi nᵾpᵾmba. 9 Wote, tᵾn nga uⱡ kit mbᵾ, Got kᵾn nimbun para ndumᵾn ndam, elim nga nimba mᵾi rurum uⱡ ei, pilpa uⱡ kun kai mbᵾ etpa, tᵾn nga uⱡ kit etmin mbᵾ, pendpa kelpa, tᵾn etpa eng nondᵾmba. 10 Tᵾn uⱡ kit iti natᵾtmᵾn nimᵾn ndam, tᵾn Got kᵾn ik kol ropᵾn nᵾtmᵾn wote, elim nga ik kupa ei, tᵾn kᵾn pi napᵾtᵾm mon!